“İqtisadiyyat və menecment” fakültəsində "The Economist Club" təşkilatçılığı ilə tələbələrarası elmi disput.

   11 Mart tarixində Xəzər Universitetinin “İqtisadiyyat və menecment” fakültəsinin “İqtisadçı” Klubunun təşkilatçılığı ilə Xəzər Universiteti və Dövlət Gömrük Komitəsi Akademiyasının tələbələri arasında elmi disput keçirilmişdir. Disput siyasi və elmi platformalarda tez-tez müzakirəyə çıxarılan və son illər ölkəmiz üçün də aktual olan bir mövzuya – “Xarici ticarət siyasəti: azad ticarət yoxsa proteksionizm” – həsr olunmuşdur. Tədbirdə “İqtisadiyyat və menecment” fakültəsinin dekanı Dr. Ceyhun Məmmədov, həmçinin departamentin akademik heyəti də elmi opponentlik və hakim funksiyasında iştirak etmişdir.

Tədbiri giriş sözü ilə açan fakültə dekanı Dr. Ceyhun Məmmədov diqqəti mövzunun aktuallığına cəlb edərək bildirdi ki, müasir dövrdəki mürəkkəb iqtisadi şəraitdə və iqtisadi qloballaşma mühitində xarici iqtisadi siyasətdə azad ticarət ilə himayədarlıq siyasətinin balansını yaratmaq ən vacib məsələlərdən hesab edilir. Həmçinin qeyd edildi ki, nə tamamilə azad ticarət, nə də təkcə proteksionist siyasət uğurlu ola bilməz. Sonra fakültə rəhbəri hər iki universitetin tələbələrinə öz tövsiyələrini verdi, bu aktual mövzunun mübahisəli məqamlarını aydınlaşdırdı və bu tip mövzuların effektiv tədqiqatı üçün lazım olan elmi metodologiyalara toxundu.

“İqtisadçı” Klubunun sədri Həsən Rəhimlinin hər iki qrup tələbələrlə bağlı qısa təqdimatından sonra tədbirin əsas hissəsinə start verildi. İlk öncə çıxış edən Gömrük Komitəsi Akademiyasının tələbələri Təvəkkül Hacıyev, Mənsurə Abdullayeva, Kazım Muradov və Emin Məmmədli dövlətin proteksionist siyasətini həm elmi-nəzəri, həm də empirik cəhətdən müdafiə edən etibarlı və əsaslı arqumentlər təklif etdilər. Ardınca Xəzər Universitetinin “İqtisadçı” Klubunun üzvləri Abdulla Nuriyev, Ənvər Bədəlov, Hüseyn Dadaşov və Qönçə Qurbanova azad ticarət siyasəti və onun üstünlüklərini özündə əks etdirən və ciddi əsaslandırılmış nəzəri mülahizələr və praktik faktları qarşı tərəfə təqdim etdilər. Qarşılıqlı sual-cavab və müzakirə şəraitində keçən ikinci hissədə tərəflərin hər biri digər tərəfin arqumentlərinə əks arqumentlərlə cavab verməyə çalışdı.